anna skvísindakona | |
mánudagur, 9. mars 2009
Um helgina keypti ég mér tvenn pör af flatbotna skóm, eitt gulllitað & annað með pallíettum. Einhverjum gæti þótt það voða gaman, en ég varð bara leið & fannst þetta álíka spennandi & að kaupa mér jogginggalla eða borga skatta. Mér leiðast flatbotna skór & hef þess vegna hvorki eytt tíma né peningum í þá hingað til. Nú eru ekki nema tveir mánuðir, 60 dagar, þar til ég get aftur farið að spóka mig um á háum hælum & það er eins gott að það verði ekkert vesen! Af því að ef ég get ekki farið aftur á hælaskóna mína, þá hef ég ekkert betra að gera við þessi 50 pör sem ég á en að leita uppi krakkahelvítið sem keyrði á mig & grýta hann til óbóta með þeim.
Æskuvinkona mín hún Barbie er fimmtug um þessar mundir. Ég vil að sjálfsögðu óska dömunni til hamingju á þessum tímamótum. Núna er ég að losna við hækjurnar & vil af því tilefni skála fyrir öllum sem stóðu undir þessu veseni: Ásgeiri mínum fyrir að vera bæði mamman & pabbinn á heimilinu, krökkunum í læknó sem sýndu mér alveg nýja & mjög alúðlega hlið á sér, þá sérstaklega Guðrúnu Eiríks & Þóru Lísu fyrir að vera bitrar með mér á ögurstundu & Ásgeiri memmér í bekk fyrir að pimpa hækjurnar. Síðast en ekki síst vil ég skála fyrir Mangó fyrir að vera alltaf algjört ljós & skutlast með mig í hjólastól um Ikea. Umtalsvert minna skál fá innskriftarhjúkkurnar á Hringbraut fyrir að leyfa mér aldrei að gleyma að þær hefðu nú farið á fyrirlestur um hækjur & vissu þessvegna allt um hvernig væri að staulast um á hækjum. Einmitt já!
föstudagur, 6. mars 2009
Muniði þegar maður var lítill & fannst geðveikt spennandi & töff að vera á hækjum? Það er rangt, alrangt. Eftir að ég ristarbrotnaði í bílslysi hef ég verið á hækjum & ég get fullyrt að ég hef ekki skemmt mér jafn illa síðan ég sá leikritið Óskastjörnuna í Þjóðleikhúsinu. Einu sinni hélt ég líka að maður styrktist við að vera á hækjum & ég hugsaði með mér að þetta væri ekki alslæmt, kannski fengi ég Chuck Norris handleggi. Það er líka rangt. Maður verður bara þreyttur & aumingjalegur. Ég er ekki alveg viss um að fólk geri sér almennt grein fyrir þessu.
|
|
|